दाङ । लुम्बिनी प्रदेशका उद्योग, पर्यटन तथा यातायात मन्त्री प्रचण्डविक्रम न्यौपानेले महोत्सवले कृषि, पर्यटन र उद्यमशिलताको प्रवर्धनमा सहयोग गर्ने बताएका छन् । घोराहीमा शुक्रवारदेखि सुरु भएको ‘छैठौँ कृषि, पर्यटन तथा व्यापार महोत्सव–२०८१ को उद्घाटन गर्दै मन्त्री न्यौपानेले उद्यमशिलताको प्रवर्धनसँगै प्रचारप्रसारमा सहयोग गर्ने बताएका छन् । कृषि उत्पादनसँगै पर्यटकीय दृष्टिकोणले जिल्लामा सम्भावना भएका स्थल रहे पनि पूर्वाधार विकास र प्रचारप्रसारको अभावका कारण पछि परेको भन्दै पर्यटकीय क्षेत्र विकासका लागि साझा धारणा बनाएर लाग्नुपर्ने बताए ।
पर्यटन क्षेत्रको विकासका लागि टुक्रेयोजना बनाएर बजेट छर्नुभन्दा सुनिश्चित सम्भावना बोकेका ठाउँ छनोट गरेर लगानी गर्न आवश्यक रहेको भन्दै मन्त्री न्यौपानेले भने, ‘जिल्लामा तुलसीपुरमा रहेको चमेरे गुफासँगै घोराहीमा रहेको बाह्रकुने दह, धारापानीलगायतका प्रशस्त धार्मिक एवम् ऐतिहासिक पर्यटकीय सम्भावना भएका ठाउँ रहेका छन्, यी ठाउँहरूको विकास गर्न साझा धारणा बनाएर प्रदेश र स्थानीय तहले लगानी गर्न सकिन्छ ।’ पर्यटकीय क्षेत्रको विकास गर्दै आन्तरिक तथा बाह्य पर्यटकलाई आकर्षित गरेर आर्थिक समृद्धि हासिल गर्न सकिने भन्दै मन्त्री न्यौपानेले त्यसका लागि तीनै तहका सरकारबिच समन्वय आवश्यक रहेको बताए । ठुला उद्योग स्थापनाले मात्रै मुलुक नबन्ने भन्दै जिल्लामा रहेका उद्यमशिलतालाई मेला महोत्सवले अघि बढाउन सहयोगी भूमिका खेल्ने बताए । लुम्बिनी प्रदेश बहुभाषिक, बहुसांस्कृतिक, कला, संस्कृति, पर्यावरणमा भरिपूर्ण रहेको भन्दै मन्त्री न्यौपानेले यहाँको संस्कृति र परम्परासँग उद्यमशिलतालाई जोडेर आयआर्जन गर्न सकिने बताएका थिए । उनले जातीय विविधतासँगै कला, संस्कृतिका दृष्टिले लुम्बिनी प्रदेश धनी भएको भन्दै यसलाई पर्यटन र आयआर्जनसँग जोड्नुपर्ने बताए ।
मन्त्री न्यौपानेले मेला महोत्सवलाई केवल मनोरञ्जनको माध्यम मात्रै नभई ज्ञान, सिप र व्यवसाय प्रवर्धनको पाठशालाका रूपमा विकास गर्नुपर्नेमा जोड दिएका थिए । स्थानीय उत्पादन, पर्यटन, कला र संस्कृति प्रवर्धनमा महोत्सवले महत्वपूर्ण भूमिका खेल्ने भन्दै कार्यक्रमका प्रमुख अतिथि रहेका मन्त्री न्यौपानेले स्थानीय उद्यमशिलताको विकासमा लुम्बिनी प्रदेश सरकार प्रतिबद्ध रहेको बताए । उद्यमशिलताको विकास गर्दै लाखौँ बिदेसिएका युवाहरूलाई स्वदेशमै रोकेर रोजगारी दिन सकिने भन्दै त्यसका लागि स्थानीय र प्रदेश सरकारसँग निजी क्षेत्रले सहकार्य गर्न आवश्यक रहेको बताएका थिए ।
महोत्सव मुल आयोजक समितिका सयोजक तथा दाङ जिल्ला उद्योग बाणिज्य संघका अध्यक्ष बसन्त जोशीको अध्यक्षतामा भएको कार्यक्रममा बोल्दै लुम्बिनी प्रदेश सभा सदस्य लोका विश्वकर्माले कृषि र पर्यटन क्षेत्रको विकाससँगै स्थानीय उत्पादन, कला संस्कृतिको प्रचारप्रसारसँगै विकासमा सहयोग पु¥याउने बताएकी थिइन् । कार्यक्रममा बोल्दै घोराही उपमहानगरपालिका नगर प्रमुख नरुलाल चौधरीले कृषि, पर्यटन र उद्यमशिलताको विकास गर्दै जिल्लालाई आर्थिक रूपमा समृद्ध बनाउन आवश्यक रहेको बताए । त्यसका लागि स्थानीय सरकारले कृषि र पर्यटन क्षेत्रको विकाससँगै उद्यमशिलताको प्रवर्धनका लागि काम गरिरहेको भन्दै उत्पादित वस्तुको बजारीकरणमा ध्यान दिनुपर्ने बताए । कार्यक्रममा बोल्ने अन्य वक्ताले कृषि, पर्यटनलगायत समग्र आर्थिक क्षेत्रको विकाससँगै आर्थिक रूपमा कमजोर रहेको अर्थतन्त्रलाई चलायमान बनाउन महोत्सवले सहयोग गर्ने बताएका थिए । सहभागीले मेला महोत्सवमा स्थानीय कृषि उत्पादनसँगै पर्यटन, हस्तकलालगायतका सामग्रीलाई प्राथमिकता दिनुपर्नेमा जोड दिएका थिए ।
कार्यक्रममा जिल्ला समन्वय समिति दाङका प्रमुख नित्तानन्द शर्मा, नेपाल उद्योग वाणिज्य महासंघका लुम्बिनी प्रदेशका अध्यक्ष कृष्णप्रसाद शर्मा, नेपाली कांग्रेस दाङका उपसभापति गिरिराज सुवेदी, नेपाली कांग्रेस दाङ क्षेत्र नं. २ का सभापति भीमप्रकाश खड्का, नेकपा एमाले दाङका सचिवालय सदस्य विवेक श्रेष्ठ, नेकपा माओवादी केन्द्र दाङका सचिव विश्वराज आचार्य, राष्ट्रिय जनमोर्चा दाङका जिल्ला अध्यक्ष गणेश आचार्य, राष्ट्रिय स्वतन्त्र पार्टी दाङका अध्यक्ष विनय घिमिरे, घरेलु तथा साना उद्योग महासंघ दाङका अध्यक्ष लभ अधिकारीलगायतले महोत्सवको सफलताका लागि शुभकामना मन्तव्य व्यक्त गरेका थिए ।
दाङ जिल्ला उद्योग वाणिज्य संघका बरिष्ठ उपाध्यक्ष नरेश श्रेष्ठको स्वागत मन्तव्यबाट सुरु भएको कार्यक्रमको सहजीकरण महासचिव महेन्द्र बुढाथोकी र सचिव विकास वलीले गरेका थिए । फागुन १८ गतेसम्म सञ्चालन हुने महोत्सवमा कृषि, पर्यटन, हस्तकला, लघुउद्यमसँगै व्यापारिक चार सय बढी स्टल रहेका छन् । महोत्सवको उद्घाटन पूर्व दाङ जिल्ला उद्योग वाणिज्य संघको कार्यालयबाट विभिन्न जातजाति, भेषभूषा झल्कने पहिचानसहित शोभायात्रा गरिएको थियो । शोभायात्रा बजारका विभिन्न भागको परिक्रममा गर्दै महोत्सवस्थल घोराही उपमहानगरपालिका–१४ झिँगौरा पुगेको थियो । महोत्सवको दोस्रो दिन शनिवार गायक राजनराज शिवकोटी, चन्द्र शर्मा, रिता केसी, अनु अधिकारी, अस्मिता गिरी, प्रेम शर्मा, सुदन थापा, राजेन्द्र चौधरीलगायतका कलाकार आउने भएका छन् ।
