दाङ । दाङ जिल्ला उद्योग वाणिज्य संघको आयोजनामा हिजोदेखी घोराहीमा सुरू भएको ‘छैठौ कृषि, पर्यटन तथा व्यापार महोत्सव २०८१’ मा तेस्रो दिन चर्चित गायक प्रकाश दुतराजसँगै दर्शकहरू झुमेका छन् । महोत्सवमा आईतवार राष्ट्रिय तथा स्थानीय कलाकारहरूको प्रस्तुति राखिएको थियो ।
‘उद्योग, व्यापार, कृषि एवं पर्यटनको विकास, परनिर्भरमुखी अर्थतन्त्रको निकास’ भन्ने मूल नाराका साथ आयोजना गरिएको महोत्सवमा गायक दुतराजले आफ्ना चर्चित गीतहरू प्रस्तुत गरेका थिए । उनले ‘कुन फुलराई दिउ शिरमै रानी’, ‘लाहुर जाने रेलैमाजाउ भो साईली सरर’, ‘घर कता हो बैनीको’, ‘लौ न साह्रै मन पर्यो’, ‘बैनी झयालैमा’, ‘मैले निमीलाई नभन्या मात्रै हो मन पर्या पहिलै हो’ र ‘जुनमाया’ बोलका गीतहरू गाएका थिए ।
उनको प्रस्तुतिमा आयोजक दाङ जिल्ला उद्योग वाणिज्य संघको टिम, राजनैतिक दलका नेताहरू लगायत अतिथिहरू छमछमी नाचेका थिए । आईतवार कलाकारहरू रीता थापा, चन्द्र शर्मा, अस्मीता पुरी, घनश्याम केसी, अपेक्षा गिरी, सन्दीप सेञ्चुरी, रचना चौधरी, उमा खनाल लगायतले सांगीतिक प्रस्तुति दिएका थिए ।
महोत्सवमा प्रदेशस्तरीय लोकदोहोरी गीत प्रतियोगिता पनि सुरू भएको छ । आईतवार भएको प्रतिस्पर्धामा प्यूठान र दाङ बी टिमबीचको प्रतिष्पर्धामा दाङ बी बिजयी भएको छ ।
सोमवार खुमन अधिकारी र भूमिका गिरीको विशेष प्रस्तुति रहनेछ । साथै, राष्ट्रिय चर्चित कलाकारहरू सिर्जना खत्री, यागेश्वर बस्नेत, लेखिना राई, लक्ष्मीमान चौधरी, उमादेवी खनाल लगायतका कलाकारहरूको प्रस्तुति रहने आयोजक मूल समितिका संयोजक तथा दाङ जिल्ला उद्योग वाणिज्य संघका अध्यक्ष वसन्त जोशीले जानकारी दिनुभयो । साथै, उहाँले महोत्सव अवलोकन गर्न सम्पूर्ण जिल्ला बासिन्दाहरूलाई अनुरोध गर्नुभएको छ ।
