रुपन्देही । रुपन्देहीको देवदहमा एक दिवसीय संसदीय बैठक प्रणाली तालिम सम्पन्न भएको छ। देवदह जेसिजको आयोजनामा तथा १८ वटा जेसिज शाखाको सहआयोजनामा सम्पन्न उक्त तालिममा संसदीय प्रक्रियाको महत्व, कानुनी संरचना, नीति निर्माण प्रक्रिया, र युवाहरूको भूमिकाबारे विस्तृत जानकारी प्रदान गरिएको थियो।
तालिमको उद्घाटन गर्दै देवदह नगरपालिकाका पूर्व नगर प्रमुख हिराबहादुर खत्रीले समाज परिवर्तनका लागि राजनीति अनिवार्य रहेको उल्लेख गर्नुभयो। उहाँले पछिल्लो समय राजनीति प्रति गलत धारणा विकसित भएकोमा चिन्ता व्यक्त गर्दै युवाहरूले सक्रिय रूपमा राजनीतिमा संलग्न हुनुपर्नेमा जोड दिनुभयो।
“राजनीतिलाई धेरैले नकारात्मक रूपमा व्याख्या गर्ने गरेका छन्। तर, समाज परिवर्तनका लागि राजनीति अति आवश्यक छ। युवा पुस्ताले संसदीय प्रणाली, नीति निर्माण प्रक्रिया, र कानुनी संरचनाको राम्रो ज्ञान राख्नुपर्छ,” खत्रीले भन्नुभयो। साथै, उहाँले नेपालको कानुनबारे गहिरो छलफल गर्न आवश्यक रहेको उल्लेख गर्दै यस्ता तालिमहरूले जनचेतना अभिवृद्धि गर्ने विश्वास व्यक्त गर्नुभयो।
कार्यक्रम देवदह जेसिजका अध्यक्ष दिपक अधिकारीको अध्यक्षतामा सम्पन्न भएको थियो। कार्यक्रममा जेसिजका राष्ट्रिय कार्यकारी उपाध्यक्ष सौरभ श्रेष्ठ, गणेश सापकोटा, राष्ट्रिय उपाध्यक्ष सन्दीप खत्री, बुटवल लेडी जेसिजकी रुपा श्रेष्ठ, कञ्चन जेसिजका प्रकाश पौडेल लगायतले आ–आफ्ना धारणा राख्नुभएको थियो। वक्ताहरूले यस्ता तालिमहरूले युवाहरूलाई जिम्मेवार नागरिक बनाउन महत्वपूर्ण भूमिका खेल्ने धारणा व्यक्त गरे।
तालिमका प्रशिक्षक सुनिल तिल्मिसेना र शिव भूषालले संसदीय बैठक प्रणालीका विविध पक्षहरूबारे जानकारी गराएका थिए। उनीहरूले संसदीय प्रक्रियाको आधारभूत पक्ष, बहस र छलफल गर्ने तरिका, कानुनी व्यवस्थापन, निर्णय प्रक्रियामा जनताको सहभागिता, र लोकतान्त्रिक प्रणालीलाई मजबुत बनाउने उपायहरूबारे प्रशिक्षण दिएका थिए।
तालिममा रुपन्देही, नवलपरासी पश्चिम, कपिलवस्तु जिल्लाका जेसिज पदाधिकारीहरूको उल्लेखनीय उपस्थिति रहेको थियो। सहभागिहरूले यस्ता तालिमहरूबाट आफूहरूलाई संसदीय प्रणालीबारे बुझ्न सजिलो भएको र यसले व्यावहारिक रूपमा समेत मद्दत पुग्ने बताएका थिए।
कार्यक्रमको स्वागत मोहन न्यौपानेले गर्नुभएको थियो भने संचालन देवदह जेसिजका महासचिव कमला अर्यालले गर्नुभएको थियो।
देवदह जेसिजका अध्यक्ष दिपक अधिकारीले यस्ता तालिमहरूले स्थानीयस्तरमा नेतृत्व विकास गर्न मद्दत गर्ने बताउनुभयो। “हाम्रो लक्ष्य भनेको युवाहरूलाई सक्षम बनाउने हो। यस्ता कार्यक्रमले युवाहरूलाई नेतृत्वदायी भूमिकामा अघि बढ्न प्रेरित गर्छ,” उहाँले भन्नुभयो।
सहभागीहरूले संसदीय प्रक्रियासम्बन्धी विस्तृत जानकारी लिन पाउँदा आफूहरूलाई निकै उत्साह मिलेको बताए। “संसदीय प्रणाली हाम्रो लोकतान्त्रिक व्यवस्थाको मेरुदण्ड हो। यसको राम्रो ज्ञान भए मात्र हामी सचेत नागरिक बन्न सक्छौँ,” एक सहभागीले भने।
पूर्व नगर प्रमुख खत्रीले विभिन्न संघसंस्थाको माध्यमबाट देवदहको प्रचारप्रसार गर्नुपर्नेमा जोड दिँदै जेसिज जस्ता संस्थाहरूले सामाजिक रूपान्तरणमा खेल्ने भूमिकालाई उच्च सम्मान गर्नुपर्ने बताउनुभयो। “स्थानीयस्तरमै चेतना अभिवृद्धि गर्ने, नेतृत्व विकास गर्ने, र सामाजिक परिवर्तनमा योगदान दिने काम युवाहरूबाटै हुनुपर्छ। जेसिजको भूमिकाले यसलाई अझ प्रभावकारी बनाउँछ,” उहाँले भन्नुभयो।
यसरी, संसदीय बैठक प्रणाली तालिमले युवाहरूलाई राजनीति र नेतृत्वदायी भूमिकामा सक्रिय हुन प्रेरित गर्दै, कानुनी संरचना र नीति निर्माण प्रक्रियाबारे गहिरो ज्ञान प्रदान गर्ने उद्देश्य लिएको आयोजकहरूले बताएका छन्।
