नवलपरासी । अन्तर्राष्ट्रिय दिवसको अवसरमा खुशी जीवन नेपाल संस्था र हिमानी कोष रुपन्देही स्वयंसेवकको संयुक्त आयोजनामा बुटवलस्थित साधना महिला विद्यालयमा सम्मान तथा सहयोग कार्यक्रम सम्पन्न भएको छ। कार्यक्रममा महिला दिदीबहिनी, शिक्षक-शिक्षिका तथा विभिन्न संघसंस्थाका प्रतिनिधिहरूको उल्लेखनीय उपस्थिति रहेको थियो।
कार्यक्रमका प्रमुख अतिथि खुशी जीवन नेपाल संस्थाका केन्द्रीय अध्यक्ष महेन्द्र विश्वकर्माले महिला सशक्तिकरणको महत्त्वमा जोड दिँदै समाजमा महिलाको योगदानको प्रशंसा गरे। विद्यालयका प्रधानाध्यापक विष्णु गौतमले महिलाहरूको भूमिकालाई सम्मान गर्दै, सशक्त महिलाले समाजलाई समृद्ध बनाउने धारणा व्यक्त गरे।
कार्यक्रममा पत्रकार तथा संस्थाका व्यक्तित्वहरूलाई सम्मान गरिनुका साथै विद्यालयलाई कापी, कलम लगायत शैक्षिक सामग्री वितरण गरिएको थियो। महिला हिंसा विरुद्ध सचेतना फैलाउँदै आएको खुशी जीवन नेपाल संस्थाले विभिन्न जिल्लामा सामाजिक सहयोग र जागरण कार्यक्रमहरू सञ्चालन गर्दै आइरहेको छ।
कार्यक्रममा खुशी जीवन नेपाल संस्थाका सचिव सुरेन्द्र चौधरी, सल्लाहकारहरू प्रीतम केसी, ज्ञान बहादुर बिक, सदस्यहरू कमला राई, जोशना रसाइली, रेजिना भट्टराई, मिना पौडेल, अशोक बज्राचार्य, विवेक पौडेल तथा हिमानी कोष स्वयंसेवक परिवारबाट प्रजुना श्रेष्ठ सिलवाल, क्रीशा न्यौपाने, क्षितिज आमा समूहकी अध्यक्ष शोभा पौडेल र क्षितिज टोल विकास संस्थाकी उपाध्यक्ष धना गौतमको उपस्थिति रहेको थियो।
अन्तर्राष्ट्रिय नारी दिवस हरेक वर्ष मार्च ८ मा विश्वभर मनाइन्छ। महिलाहरूको अधिकार, समानता, सामाजिक, आर्थिक तथा राजनीतिक सशक्तिकरणका लागि जागरूकता फैलाउने उद्देश्यले यो दिवस मनाइन्छ। सन् १९०८ मा अमेरिकामा महिलाहरूले कामको उचित पारिश्रमिक र मतदान अधिकारका लागि प्रदर्शन गरेपछि सन् १९१० मा जर्मनीकी नेतृ क्लारा जेट्किनले नारी दिवस मनाउने प्रस्ताव राखिन्। सन् १९७५ मा संयुक्त राष्ट्रसंघले मार्च ८ लाई अन्तर्राष्ट्रिय नारी दिवसको रूपमा मान्यता दियो।
महिला सशक्तिकरणले शिक्षामा समान पहुँच, आर्थिक स्वतन्त्रता, राजनीतिक सहभागिता, स्वास्थ्य सुरक्षालगायतका क्षेत्रमा योगदान पुर्याउँछ। शिक्षाले आत्मनिर्भरता दिन्छ भने आर्थिक सशक्तिकरणले महिलाहरूलाई वित्तीय निर्णयमा सक्षम बनाउँछ। राजनीतिक उपस्थितिले नीति निर्माणमा समावेशिता बढाउँछ, जसले महिलाहरूलाई थप अवसरहरू दिलाउन मद्दत गर्छ।
समाजको दिगो विकासका लागि महिला सशक्तिकरण आवश्यक छ। जब महिलाहरू शिक्षित, आत्मनिर्भर र सुरक्षित हुन्छन्, तब समाज र राष्ट्रसमेत समृद्ध बन्छ। महिलाहरूलाई समान अवसर, सम्मान र अधिकार प्रदान गर्नु सम्पूर्ण समाजको जिम्मेवारी हो। यस नारी दिवसमा हामी सबैले मिलेर महिलाको सशक्तिकरणका लागि प्रतिबद्ध बनौं। सशक्त महिला, सशक्त समाज, सशक्त राष्ट्र!
