देवदह। देवदह नगरपालिका, चा्लु आर्थिक वर्ष २०८१/८२ मा विभिन्न महत्वपूर्ण निर्णयहरू गर्दै विकास निर्माणलाई तीव्रता दिने योजनामा लागेको छ। नगर कार्यपालिकाको बैठकले ठेक्का प्रक्रियामा रहेका आयोजना, उपभोक्ता समितिबाट सञ्चालित योजना, नगर विकास कोषसँगको सहकार्य, नदिजन्य पदार्थ व्यवस्थापन र आर्थिक पारदर्शितामा जोड दिने निर्णय गरेको छ।
नगरपालिकाले यस वर्षका योजनाहरूलाई समयमै सम्पन्न गर्ने र पारदर्शिता कायम राख्नका लागि थप सक्रियता अपनाउने प्रतिबद्धता जनाएको छ। ठेक्का प्रक्रियामा रहेका योजनाहरूको पूर्णता २०८२ जेठ १५ भित्र र अन्य सम्पूर्ण योजनाहरूलाई २०८२ वैशाख मसान्तसम्म पूरा गर्ने निर्णय गरिएको छ। यसका लागि सम्बन्धित शाखा र निर्माण व्यवसायीलाई निर्देशन दिइएको छ।
नगर विकास कोषसँगको सहकार्यमा “Urban Resilience and Livability Improvement Project (URLIP)” लागू गरिने भएको छ। नेपाल सरकार र नगर विकास कोषबीचको सम्झौतामा नगरपालिकाले १८% सम्म लगानी ल्याउने निर्णय गरेको छ। यस परियोजनामा इन्जिनियर राजकुमार यादवलाई समन्वयको जिम्मेवारी दिइएको छ।
नगरपालिकाले नदिजन्य पदार्थहरूको व्यवस्थापनका लागि विभिन्न योजनाहरू अघि बढाउने निर्णय गरेको छ। घोडाहा दाउन्ने खोला, घोडाहा सरन खोला, भलुही खोला लगायतका नदिहरूमा रहेको नदिजन्य पदार्थहरूको व्यवस्थापन राष्ट्रपति चुरे तराई मधेश संरक्षण विकास समितिको सहमतिअनुसार गरिनेछ।
पारदर्शिता कायम राख्न प्रत्येक महिनाको ७ गते आय-व्यय विवरण सार्वजनिक गर्ने निर्णय गरिएको छ। यसका साथै, नगरपालिकाले भौतिक र आर्थिक प्रगतिको मासिक जानकारी दिने जनाएको छ। यसै महिना देखि, नगरपालिकाले निर्माण र वस्तु खरिदसम्बन्धी योजनाहरूको प्रगति विवरण नियमित रुपमा सार्वजनिक गर्ने निर्णय गरेको छ।
नगरपालिकाले १ अर्व २५ करोड २३ लाख ६५ हजार ५ सय रुपैयाँ कुल बजेट विनियोजन गरेको छ। यस वर्ष ४७% भन्दा बढी बजेट खर्च भएको र औसतमा २७.९८% बजेट खर्च भएको जानकारी दिइएको छ। नगरपालिकाका विभिन्न शाखाले शिक्षामा ५७.१३%, स्वास्थ्यमा ३८.६७%, कृषिमा १९.०७% र पशुपन्छिमा २१.२८% विकासमा बजेट खर्च गरेका छन्।
मुख्य प्रशासकिय अधिकृत कृष्ण प्रसाद सापकोटाले नगरपालिकाका सबै योजनाहरूलाई प्रभावकारी ढंगले कार्यान्वयन गर्न नियमित मिडिया रिपोर्टिङको महत्त्व दर्शाउँदै, सेवा प्रवाहलाई चुस्त बनाउने कार्यमा थप जोड दिन निर्देशन दिएका छन्।
कार्यक्रममा उपस्थित सञ्चारकर्मीहरुले उठाएका सवालहरूमा जवाफ दिँदै कार्यवाहक नगर प्रमुख विद्यालक्ष्मी गुरुङ्गले नगरपालिकाको गुनासो समाधान गर्ने दायित्वलाई प्राथमिकता दिने बताए। उनले नगरपालिकाका सेवालाई थप चुस्त र प्रभावकारी बनाउने निर्णय गरेका छन्।
यस वर्ष, नगरपालिकाको बेरुजु रकम २० करोड ५४ लाख रुपैयाँ बढि रहेको र आगामी वर्षमा यसलाई घटाउने लक्ष्य राखिएको जानकारी दिइएको छ।
