रुपन्देही । वन डढेलोको जोखिम बढ्दै गएपछि देवदहमा यसलाई नियन्त्रण गर्न एक हप्ते सचेतनामूलक अभियान सुरु गरिएको छ। गाउँ वन समन्वय सञ्जाल, रुपन्देहीको आयोजनामा सञ्चालन हुने यो अभियानअन्तर्गत चैत ७ गते वृहत् जनचेतना र्याली आयोजना गरिने भएको छ।
सञ्जालका अध्यक्ष खेम नारायण अधिकारीका अनुसार सामुदायिक वन, स्थानीय संघसंस्था, आमा समूह तथा विभिन्न सामाजिक संघसंस्थाहरूको सहभागितामा सचेतना र्याली सञ्चालन गरिनेछ।
शितलनगरस्थित सव-डिभिजन वन कार्यालयबाट बिहान ७ बजे सुरु हुने र्याली स्मृति सामुदायिक वन, शिवालय सामुदायिक वन हुँदै बुद्ध सामुदायिक वनको कार्यालयमा पुगेर समापन हुने छ। तीन सयभन्दा बढी व्यक्ति सहभागी रहने अपेक्षा गरिएको छ। र्यालीमा सहभागीहरूले प्लेकार्ड तथा सचेतनामूलक सामग्री प्रदर्शन गरी डढेलो नियन्त्रणको आवश्यकता र कानुनी कारबाहीबारे जागरूकता फैलाउनेछन्।
सचेतना कार्यक्रम एक सातासम्म सञ्चालन गरिने भए पनि, वर्षा नहुँदासम्म आगलागी नियन्त्रणका अन्य कार्यक्रमहरू निरन्तर जारी रहने सञ्जालका सचिव टेक बहादुर रानाले जानकारी दिनुभयो। साथै, वन डढेलो कानुनी तथा सामाजिक अपराध भएकाले यस्तो कार्य गर्नेलाई कारबाही गरिने चेतावनी समेत दिइएको छ।
वन डढेलोको असर मानव स्वास्थ्य, वातावरण तथा वन्यजन्तुमा समेत गम्भीर पर्ने भएकाले देवदहका सामुदायिक वनहरूले यसलाई नियन्त्रणको पहिलो प्राथमिकता बनाएका छन्। सञ्जालकी उपाध्यक्ष रुका सापकोटाका अनुसार डढेलो नियन्त्रण केवल वन समूहको मात्र नभई आम नागरिकको पनि जिम्मेवारी हो। त्यसैले बढीभन्दा बढी सहभागिता जनाउन सबैलाई आह्वान गरिएको छ।
शितलनगर सब-डिभिजन वन कार्यालयका प्रमुख रविन्द्रनाथ चौधरीका अनुसार फागुनदेखि जेठसम्म वन डढेलोको उच्च जोखिम हुने भएकाले आगामी तीन महिना निगरानी बढाइनेछ। सम्भावित आगलागी रोक्न थप वन हेरालु परिचालन गर्ने तथा आवश्यक स्थानमा आगो नियन्त्रण रेखा निर्माण गर्ने योजना बनाइएको छ।
सञ्जालले वन जोगाउने अभियानमा सबै नागरिकको साथ आवश्यक रहेको भन्दै सचेतना कार्यक्रमहरूमा सक्रिय सहभागिताका लागि आग्रह गरेको छ। “डढेलो नियन्त्रण हाम्रो साझा दायित्व हो, त्यसैले सधैं सतर्क रहन आवश्यक छ,” सञ्जालले जारी गरेको सूचनामा उल्लेख गरिएको छ।
