बर्दघाट । पश्चिम नवलपरासीको बर्दघाटमा यात्रुवाहक बस र स्कुल बस आपसमा ठोक्किँदा १४ जना विद्यार्थी सहित २० जना घाइते भएका छन्।
बर्दघाट स्थित चिसापानी सामुदायिक अस्पताल अगाडि सोमबार बिहान भएको दुर्घटनामा गम्भीर घाइतेहरूलाई अस्पताल लगिएको छ।
नवलपरासी सुस्ता गाउँपालिका निवासी प्राविधिक बिरेन्द्र मण्डल चढेको बा २ ब ६५४९ नम्बरको मोटरसाइकल अचानक सडक पार गर्दा ग २ ख १५७४ नम्बरको यात्रुवाहक बसले ठक्कर दिएको थियो। ठक्करपछि बस अनियन्त्रित भई सडक किनारमा रोकेर विद्यार्थी चढाइरहेको बस भुताहस्थित ग्लोबल एकड्मिको लु १ ख ८७० नम्बरको स्कुल बसलाई ठक्कर दिएको थियो।
दुर्घटनामा १४ विद्यार्थी र ६ अन्य यात्रु घाइते भएका छन्। स्थानीयबासी र प्रहरीको सहयोगमा घाइतेहरूलाई उपचारका लागि अस्पताल पठाइएको छ। दुर्घटनाको थप अनुसन्धान भइरहेको प्रहरीले जनाएको छ।
