featured photo: Darpanpost

लुम्बिनी, असाेज ११ । भगवान बुद्धकाे जन्मस्थल लुम्बिनीमा पर्यटकलाई स्वागत गरेर विश्व पर्यटन दिवस मनाइएकाे छ । लुम्बिनी प्रदेशका उद्याेग पर्यटन तथा यातायात मन्त्री प्रचण्ड विक्रम न्याैपाने र लुम्बिनी विकास काेषका उपाध्यक्ष डा.ल्हारक्याल लामा (खेन्पाे छिमे छिरिङ) ले पर्यटकहरूलाई खादा ओढाएर स्वागत गरेका हुन् । पर्यटकहरूलाई स्वागत गर्दै मन्त्री न्याैपानेले पर्यटन विकासका लागि प्रदेश सरकारले लुम्बिनी विकास काेष संग सहकार्य गर्ने बताए । लुम्बिनीकाे वृहत् विकासका लागि संघीय सरकार, प्रदेश सरकार र स्थानीय सरकारबिच समन्वय हुन आवश्यक रहेकाेमा जाेड दिए । लुम्बिनी विकास काेषका उपाध्यक्ष डा.लामाले पर्यटकहरूकाे सुविधाका लागि याेजना बनाएर काम गरिरहेकाे बताए । लुम्बिनीकाे पूर्वाधार विकास र आध्यात्मिक विकासका लागि सबै क्षेत्रसंग सहकार्य गर्ने बताए । पर्यटन दिवस कार्यक्रममा लुम्बिनी होटल संघ नेपालका बरिष्ठ उपाध्यक्ष लिलामणि शर्माले लुम्बिनीको पर्यटनबाट देशलाई नै समृद्ध बनाउन सकिने बताए । उनले पर्यटन दिवससँगै लुम्बिनीमा पर्यटनहरुको आवागमन बृद्धि गर्ने कार्ययोजना ल्याउन पर्यटनमन्त्रीसँग आग्रह गरे ।

लुम्बिनी विकास कोषका सूचना तथा जनसम्पर्क प्रमुख डा. हरिध्वज राईले “पर्यटन र शान्ति“ भन्ने नारा सहित मनाइएको पर्यटन दिवसमा लुम्बिनीमा भने यात्रा, अध्यात्म र चिन्तन मार्फत शान्तिको प्रवर्द्धन गरौं नारा तय गरी मनाइएको बताए ।
निरन्तर वर्षात भएकाले शान्तिदीप स्थित थाई भिजिटर सेन्टरमा स्वागत गरिएको हो । कार्यक्रममा लुम्बिनी विकास कोषका कोषाध्यक्ष ढुण्डिराज भट्टराई, सदस्य सचिव सानुराजा शाक्य, बरिष्ठ निर्देशक ज्ञानिन राई, सूचना अधिकारी राजन बस्नेत लगायतको उपस्थिती रहेको थियो ।

लुम्बिनीमा स्वागत गरिएका पर्यटकहरुलाई लुम्बिनी होटल संघ नेपालले तिलौराकोट, रामग्राम लगायतका क्षेत्रमा एक दिन भ्रमण र बासको व्यवस्था गरेको अध्यक्ष गोविन्द ज्ञवालीले बताए ।
लुम्बिनी विकास कोषको आयोजनामा भएको कार्यक्रममा लुम्बिनी साँस्कृतिक नगरपालिका, लुम्बिनी होटल एशोसियसन, लुम्बिनी पर्यटन व्यावसायी संघ, महामाया रिक्सा चालक संघ, लुम्बिनी स्थानीय पथ प्रदर्शक संघ, लुम्बिनी अन्तरराष्ट्रिय विहारहरुको सहभागिता रहेको थियो । लुम्बिनीमा सन् २०२४ को अगस्ट महिनासम्म आन्तरीक र बाह्य गरी ६ लाख १२ हजार ४७७ जना पर्यटकले भ्रमण गरेका छन् । अघिल्लो बर्ष करिव १० लाख पर्यटकले लुम्बिनी भ्रमण गरेका थिए । यो वर्ष सिजन शुरु भएकाले पर्यटक संख्या बढ्ने अनुमान गरिएको छ । प्रत्येक वर्ष सेप्टेम्बर २७ तारिखका दिन विश्व पर्यटन दिवस मनाउने गरिन्छ ।