देवदह । देवदह खानेपानी तथा सरसफाई उपभोक्ता संस्थाको पाइपमा भीषण आगलागी हुँदा करिब १० लाख रुपैयाँ बराबरको क्षति भएको छ।
खानेपानीका कर्मचारीहरूले सरसफाइ गर्ने क्रममा फोहोर जलाउँदा आगो अनियन्त्रित भई फैलिएको खैरेनी प्रहरी चौकीका इन्चार्ज प्रहरी निरीक्षक एक्क बहादुर नेपाली ले जानकारी दिनुभयो।
देवदह ७ सावित्री टोलस्थित खानेपानी संस्थानको पानीको बोरिङ रहेको कम्पाउन्ड भित्र फोहोर जलाउने क्रममा हावाको तीव्र प्रभावका कारण आगो प्लास्टिक पाइपमा फैलिएर नियन्त्रण बाहिर गएको थियो।
देवदहको खानेपानीमा आगोलागि हुदाँ ६३ mm – ३९०० मिटर, ६६ mm – १९०० मिटर, ११० mm – ११०० मिटर, १२५ mm – ५०० मिटर, २०० mm – ३०० मिटर पाइपहरु नष्ट भएका छन् । प्रहरी चौकी खैरेनीबाट प्रहरी सहायक निरीक्षक नगेन्द्र बहादुर क्षेत्रीको नेतृत्वमा ५ जनाको टोली, देवदह नगरपालिकाको दमकल तथा स्थानीयबासीको सक्रिय सहयोगमा दिउँसो ४:१५ बजे आगलागी नियन्त्रणमा ल्याइएको थियो।
गर्मी याममा दिनहुँ आगलागीका घटनामा वृद्धि भइरहेको छ। विभिन्न संघसंस्थाहरूले आगलागी नियन्त्रणका उपाय अवलम्बन गर्न आग्रह गरेका छन्। प्रत्येक वर्ष गर्मी मौसममा यस्ता घटनाका कारण लाखौँको क्षति हुने गरेको छ ।
